घाई नको! पर्सनल लोन अ‍ॅग्रीमेंटवर सही करण्यापूर्वी ‘या’ महत्त्वाच्या गोष्टी नक्की तपासा

पहिल्यांदाच पर्सनल लोन घेत असाल, तर बँकेने दिलेल्या कागदांवर लगेच सही करू नका. कारण, करारातील एक चुकीची अट तुमच्यावर दीर्घकाळ आर्थिक ओझं टाकू शकते. वेळ लागला तरी चालेल, पण पर्सनल लोन अ‍ॅग्रीमेंट पूर्णपणे वाचल्यानंतरच स्वाक्षरी करा.

आजकाल वैयक्तिक गरजा पूर्ण करण्यासाठी अनेक जण पर्सनल लोन घेतात. मात्र, पर्सनल लोन हे असुरक्षित कर्ज (Unsecured Loan) असल्यामुळे त्यावर आकारले जाणारे व्याजदर आणि शुल्क इतर कर्जांच्या तुलनेत जास्त असतात. त्यामुळे करारातील प्रत्येक अट समजून घेणं अत्यंत गरजेचं आहे.

जर तुम्ही पहिल्यांदाच बँक किंवा फायनान्स कंपनीकडून पर्सनल लोन घेण्याचा विचार करत असाल, तर खाली दिलेल्या मुद्द्यांकडे दुर्लक्ष करू नका.

प्रीपेमेंट आणि फोरक्लोजर शुल्क

कर्ज वेळेआधी फेडायचं ठरवलं, तर बँक प्रीपेमेंट किंवा फोरक्लोजर चार्ज आकारते. हे शुल्क साधारणतः कर्जाच्या उरलेल्या रकमेवर २ ते ५ टक्के इतकं असू शकतं. काही वेळा हे शुल्क करारात जास्त प्रमाणात नमूद केलेलं असतं, त्यामुळे ही अट नीट वाचा.

EMI उशिरा भरल्यास दंड

EMI वेळेवर न भरल्यास बँक लेट पेमेंट चार्ज लावते. यासोबतच तुमच्या क्रेडिट स्कोअरवर (CIBIL Score) देखील वाईट परिणाम होऊ शकतो. करारात नमूद केलेला दंड किती आहे, हे आधीच तपासा.

प्रक्रिया शुल्क व लपविलेले चार्जेस

अनेक वेळा बँका लोन मंजूर करताना प्रक्रिया शुल्क, सेवा शुल्क, GST अशा छुप्या आकारणी करतात.
हे सर्व शुल्क करारात नमूद असतं, पण तोंडी सांगितलं जात नाही. त्यामुळे प्रत्येक चार्ज लक्षपूर्वक तपासा.

हेही वाचा: क्रिप्टो ट्रेडिंग करणाऱ्यांसाठी मोठी बातमी! आता लोकेशन ट्रॅक, लाईव्ह सेल्फी बंधनकारक

व्याजदर स्थिर आहे की बदलणारा?

पर्सनल लोनवर Fixed Interest Rate किंवा Floating Interest Rate लागू असू शकतो.
फ्लोटिंग रेट असल्यास भविष्यात व्याज वाढू शकतं आणि तुमचा EMI वाढण्याची शक्यता असते. ही अट नीट समजून घ्या.

लोन कालावधी (Tenure) नीट तपासा

जास्त कालावधीसाठी लोन घेतल्यास EMI कमी होतो, पण एकूण व्याज जास्त भरावं लागतं.
कमी कालावधी = जास्त EMI, पण कमी व्याज. स्वतःच्या उत्पन्नानुसार योग्य कालावधी निवडा.

विमा (Loan Insurance) सक्तीचा आहे का?

काही बँका पर्सनल लोनसोबत लोन इन्शुरन्स सक्तीचा असल्याचं सांगतात. प्रत्यक्षात तो ऐच्छिक असतो. जबरदस्तीने लावला जात असेल, तर नकार देऊ शकता.

जर एखादी अट समजत नसेल, तर बँक अधिकाऱ्याला स्पष्ट प्रश्न विचारा. गरज वाटल्यास करार घरी नेऊन वाचा. “आत्ताच सही करा” असा दबाव आल्यास सावध व्हा. पर्सनल लोन गरजेचं असलं तरी अज्ञानामुळे घेतलेलं कर्ज भविष्यात डोकेदुखी ठरू शकतं. त्यामुळे घाई न करता, प्रत्येक अट समजून घेऊनच पर्सनल लोन अ‍ॅग्रीमेंटवर सही करा.