Maharashtra Election Results 2026 LIVE : मुंबई–पुण्यासह 29 महापालिकांत सत्तांतराचे संकेत, ठाकरे गटाला सकाळीच मोठा धक्का

महाराष्ट्रातील 29 महापालिकांच्या निवडणुकीची मतमोजणी आज सकाळपासून सुरू असून सुरुवातीच्या कलांनीच राज्याच्या राजकारणात मोठी खळबळ उडवली आहे. मुंबई, पुणे, नाशिकसह अनेक महापालिकांमध्ये भाजपा आणि शिवसेना शिंदे गटाची आघाडी दिसून येत असून ठाकरे गटासाठी हे निकाल धक्कादायक ठरत असल्याचे चित्र आहे. प्रत्येक मिनिटाला बदलणाऱ्या आकडेवारीमुळे राज्यभर उत्सुकता शिगेला पोहोचली आहे.

राज्यातील 29 महापालिकांच्या निवडणुकांची मतमोजणी सुरू असून एकामागोमाग एक निकाल हाती येत आहेत. सुरुवातीच्या ट्रेंडनुसार, भाजपा आणि शिवसेना शिंदे गटाने अनेक ठिकाणी आघाडी घेतल्याचे दिसत आहे. विशेषतः मुंबई महापालिकेत महायुतीने दमदार सुरुवात करत सुमारे 50 जागांवर आघाडी घेतली असून ठाकरे गटासाठी हा मोठा धक्का मानला जात आहे.

मुंबई महापालिका निकाल 2026

मुंबईत सुरुवातीच्या कलांमध्येच भाजपा–शिंदे युतीने वर्चस्व गाजवले आहे. पहिल्या फेरीतच महायुती 50 जागांवर आघाडीवर असल्याची माहिती समोर आली आहे. भाजप नेते चंद्रकांत पाटील यांनी मुंबईत भाजपा 130 पेक्षा कमी जागांवर येणार नाही, असा थेट दावा केल्याने राजकीय वातावरण तापले आहे.

पुणे महापालिका निकाल

पुणे महापालिकेत भाजपाने जोरदार मुसंडी मारली असून तब्बल 33 जागांवर आघाडी घेतली आहे. पुण्यातील निकालांकडे संपूर्ण राज्याचे लक्ष लागले असून भाजपाची कामगिरी निर्णायक ठरेल, असे चित्र आहे.

25 वर्षांच्या सत्तेला धक्का? मुंबईचा सर्वात चर्चेतला एक्झिट पोल समोर

मतमोजणीदरम्यान गोंधळ

जालन्यात मतमोजणी केंद्रावर पोलिस आणि भाजपच्या उमेदवारांमध्ये बाचाबाची झाल्याची माहिती मिळाली आहे. उमेदवारांच्या प्रतिनिधींना प्रवेश देताना गोंधळ उडाल्याचा आरोप करण्यात आला असून प्रशासनाच्या निष्काळजीपणावर भाजप उमेदवारांनी नाराजी व्यक्त केली आहे.

छत्रपती संभाजीनगरमध्ये तणाव

छत्रपती संभाजीनगरमध्ये मतमोजणीपूर्वी मोठा राडा झाला असून पोलिसांनी लाठीचार्ज केल्याची माहिती आहे. शिवसेना शिंदे गटाच्या कार्यकर्त्यांनी ठिय्या आंदोलन केल्याने वातावरण तणावपूर्ण बनले आहे.

काँग्रेसचा दावा

काँग्रेस नेते विजय वडेट्टीवार यांनी चंद्रपूरसह अमरावती, कोल्हापूर, लातूर आणि जालना येथे काँग्रेस सत्ता स्थापन करेल, असा दावा केला आहे. पैशाचा आणि यंत्रणांचा गैरवापर झाल्याचा आरोपही त्यांनी केला.