Lalbaugcha Raja Visarjan 2026: लालबागच्या राजाला आज निरोप; पाहा विसर्जन मिरवणुकीचा संपूर्ण मार्ग आणि वेळ

मुंबईचा लाडका बाप्पा लालबागचा राजा याच्या विसर्जनाचा क्षण आता जवळ आला आहे. गणेशोत्सवाच्या दहा दिवसांच्या उत्सवानंतर लालबागच्या राजाची भव्य विसर्जन मिरवणूक 25 सप्टेंबर रोजी लालबागमधून सुरू झाली. हजारो भाविकांनी या मिरवणुकीत सहभागी होत बाप्पाला भावपूर्ण निरोप दिला. मिरवणूक दक्षिण मुंबईतील प्रमुख मार्गांवरून जात गिरगाव चौपाटीकडे रवाना झाली.

लालबागचा राजा सार्वजनिक गणेशोत्सव मंडळाने यंदाच्या विसर्जनासाठी विशेष नियोजन केले आहे. मंडळाच्या अधिकृत माहितीनुसार 24 सप्टेंबरपासून चरणस्पर्श आणि मुखदर्शनाच्या रांगा बंद करण्याची प्रक्रिया सुरू झाली होती. त्यानंतर विसर्जन मिरवणुकीची तयारी अंतिम टप्प्यात पोहोचली.

सकाळच्या पूजेनंतर सुरू झाली भव्य मिरवणूक

25 सप्टेंबर रोजी सकाळी धार्मिक विधी आणि आरतीनंतर लालबागच्या राजाच्या विसर्जन मिरवणुकीला सुरुवात झाली. उपलब्ध माहितीनुसार सकाळी 9 वाजता कार्यक्रमाची सुरुवात झाली आणि त्यानंतर पूजा व उत्तरपूजा पार पडली. त्यानंतर दुपारी राजेशाही विसर्जन मिरवणूक मार्गस्थ झाली. लालबागच्या राजाच्या दर्शनासाठी आणि मिरवणूक पाहण्यासाठी दक्षिण मुंबईतील विविध भागांत मोठ्या संख्येने भाविक जमा झाले होते. मिरवणुकीदरम्यान ढोल-ताशांचा गजर, गुलाल आणि फुलांची उधळण अशा वातावरणात बाप्पाला निरोप देण्यात आला.

लालबाग ते गिरगाव चौपाटी असा मिरवणुकीचा मार्ग

लालबागच्या राजाची विसर्जन मिरवणूक लालबाग मार्केटपासून सुरू होऊन डॉ. बाबासाहेब आंबेडकर मार्गाने पुढे गेली. त्यानंतर भारतमाता सिनेमा, लालबाग पोलीस चौकी आणि लालबागच्या मुख्य प्रवेशद्वाराकडून मिरवणूक पुढे सरकली. यानंतर चिंचपोकळी ब्रिज, भायखळा रेल्वे स्थानक, हिंदुस्तान मस्जिद आणि मुंबई अग्निशमन दलाच्या मुख्यालयाजवळून मिरवणूक गेली. अग्निशमन दलाकडून पारंपरिक पद्धतीने सायरन वाजवून लालबागच्या राजाला सलामी देण्यात आली.

दोन टाकी परिसरातही भाविकांची गर्दी

मिरवणूक पुढे खडा पारसी, दोन टाकी, कुंभारवाडा आणि सुतार गल्लीमार्गे पुढे जाणार आहे. त्यानंतर माधव बाग, व्ही. पी. रोड आणि प्रार्थना समाज परिसरातून मिरवणूक गिरगाव चौपाटीच्या दिशेने रवाना झाली. दोन टाकी परिसरात विविध समाजातील नागरिकांकडून लालबागच्या राजाचे स्वागत करण्याची परंपरा आहे. त्यामुळे या मार्गावरही मोठ्या संख्येने भाविक उपस्थित राहतात.

गणपती विसर्जनासाठी मुंबई सज्ज; गिरगाव चौपाटीवर BMCचा विशेष कंट्रोल रूम

गिरगाव चौपाटीवर आज अंतिम विसर्जन

मिरवणूक गिरगाव चौपाटीवर पोहोचल्यानंतर लालबागच्या राजाच्या अंतिम विसर्जनाची तयारी करण्यात आली. उपलब्ध माहितीनुसार 26 सप्टेंबर रोजी सकाळी लालबागच्या राजाच विसर्जन सोहळा तराफ्यावरून अरबी समुद्रात पार पडणार आहे. लालबागच्या राजाच्या विसर्जनासाठी मुंबई पोलीस, महापालिका आणि इतर संबंधित यंत्रणांकडून विशेष व्यवस्था करण्यात आली आहे. विसर्जनाच्या पार्श्वभूमीवर दक्षिण मुंबईतील अनेक रस्त्यांवर वाहतूक निर्बंध, मार्ग बदल आणि नो-पार्किंगची व्यवस्था करण्यात आली आहे.

बाप्पाला निरोप देण्यासाठी भाविकांची मोठी गर्दी

लालबागचा राजा हा मुंबईतील सर्वाधिक प्रसिद्ध गणपतींपैकी एक असल्याने त्याच्या विसर्जन मिरवणुकीला दरवर्षी मोठी गर्दी होते. यंदाही लालबागपासून गिरगाव चौपाटीपर्यंतच्या मार्गावर भाविकांची मोठी उपस्थिती पाहायला मिळाली. दहा दिवसांच्या गणेशोत्सवानंतर बाप्पाला निरोप देताना भाविकांमध्ये भावनिक वातावरण पाहायला मिळत आहे. ‘गणपती बाप्पा मोरया, पुढच्या वर्षी लवकर या’च्या जयघोषात लालबागचा राजा आता अंतिम विसर्जनासाठी समुद्राच्या दिशेने रवाना झाला आहे.