आषाढी वारीत माणुसकीचं दर्शन! DCP डॉ. संदीप भाजीभाकरे यांनी फिट आलेल्या वारकऱ्याचे प्राण वाचवले

पुणे: आषाढी वारीच्या पार्श्वभूमीवर पुणे शहरात वारकऱ्यांच्या स्वागतासाठी प्रशासन सज्ज असताना माणुसकीचा एक हृदयस्पर्शी प्रसंग समोर आला. पुणे शहर वाहतूक शाखेचे पोलीस उपायुक्त (DCP) डॉ. संदीप भाजीभाकरे यांनी रस्त्यावर अचानक फिट येऊन कोसळलेल्या एका वारकऱ्याला तातडीने प्रथमोपचार देत त्याचे प्राण वाचवल्याची घटना घडली. या घटनेचा व्हिडिओ सोशल मीडियावर मोठ्या प्रमाणात व्हायरल होत असून नागरिकांकडून त्यांच्या तत्परतेचे कौतुक केले जात आहे.

अचानक वारकरी कोसळला

वारी मार्गावरील वाहतूक व्यवस्थापनाची पाहणी सुरू असताना एका वारकऱ्याला अचानक फिट आली आणि तो रस्त्यावर कोसळला. आसपासच्या लोकांमध्ये काही काळ गोंधळाचे वातावरण निर्माण झाले. त्याचवेळी घटनास्थळी उपस्थित असलेले DCP डॉ. संदीप भाजीभाकरे यांनी कोणतीही वेळ न दवडता त्या वारकऱ्याजवळ धाव घेतली.

तत्परतेने दिले प्रथमोपचार

डॉ. भाजीभाकरे यांनी परिस्थितीचे गांभीर्य ओळखून वारकऱ्याला सुरक्षित स्थितीत ठेवत आवश्यक प्रथमोपचार सुरू केले. त्याचवेळी वैद्यकीय मदत आणि रुग्णवाहिका तातडीने बोलावण्यात आली. वेळेत उपचार मिळाल्यामुळे संबंधित वारकऱ्याची प्रकृती स्थिर झाल्याचे सांगितले जात आहे.

हेही वाचा: मुंबईत भररस्त्यात थार चालकाचा धिंगाणा; दोन दुचाकींना जोरदार धडक, व्हिडिओ व्हायरल

सोशल मीडियावर कौतुकाचा वर्षाव

या घटनेचा व्हिडिओ समोर आल्यानंतर सोशल मीडियावर नागरिकांनी DCP डॉ. संदीप भाजीभाकरे यांच्या तत्परतेचे आणि संवेदनशीलतेचे भरभरून कौतुक केले. “पोलीस केवळ कायदा-सुव्यवस्था राखत नाहीत, तर गरज पडल्यास जीव वाचवण्यासाठीही धावून येतात,” अशा प्रतिक्रिया अनेकांनी व्यक्त केल्या.

वारीत सुरक्षा व्यवस्थाही कडक

आषाढी वारीदरम्यान लाखो वारकरी पुणे शहरातून मार्गक्रमण करत असल्याने वाहतूक नियंत्रण, वैद्यकीय मदत, आपत्कालीन प्रतिसाद आणि सुरक्षा यासाठी पोलीस प्रशासनाने विशेष नियोजन केले आहे. अशा परिस्थितीत घडलेली ही घटना पोलिसांच्या सज्जतेचे उदाहरण म्हणून पाहिली जात आहे.