वेअरेबल तंत्रज्ञानात मोठा बदल; Google आणि XREAL ची नवी एआय झेप

गेल्या काही वर्षांपासून तंत्रज्ञान विश्वात ऑगमेंटेड रिअ‍ॅलिटी (AR) आणि मिक्स्ड रिअ‍ॅलिटी (MR) गॅजेट्सवर मोठ्या प्रमाणावर प्रयोग सुरू आहेत. आता गुगलने या क्षेत्रात थेट आघाडी घेण्यासाठी प्रख्यात हार्डवेअर ब्रँड एक्सरीअल (XREAL) सोबत हातमिळवणी केली असून ‘AURA’ हे प्रगत स्मार्ट ग्लासेस जागतिक स्तरावर सादर केले आहेत. विशेष म्हणजे, गुगलच्या नव्या Android XR प्लॅटफॉर्मचा प्रत्यक्ष वापर करणारे हे सुरुवातीचे व्यावसायिक स्मार्ट ग्लासेस ठरले आहेत.

बाजारात सध्या उपलब्ध असणारे व्हर्च्युअल हेडसेट्स आकारमानाने मोठे असल्याने ते दीर्घकाळ परिधान करणे वापरकर्त्यांसाठी गैरसोयीचे ठरत होते. यावर तोडगा काढत, नेहमीच्या सनग्लासेससारख्या आकाराच्या चष्म्यात संपूर्ण संगणकीय क्षमता सामावून घेण्याचा यशस्वी प्रयत्न या उपकरणाच्या माध्यमातून करण्यात आला आहे. हे गॅजेट केवळ मनोरंजनापुरते मर्यादित नसून दैनंदिन कार्यालयीन काम, कोडिंग आणि मल्टिटास्किंगसाठी पूरक साधन म्हणून डिझाइन केले गेले आहे.

काय आहेत AURA स्मार्ट ग्लासेसची वैशिष्‍ट्ये?

वापरकर्त्यांना हलकेफुलके आणि हाय-स्पीड परफॉर्मन्स देण्याच्या उद्देशाने हार्डवेअरच्या रचनेत काही अनोखे तांत्रिक बदल करण्यात आले आहेत.

१. हलके वजन आणि स्प्लिट डिझाइन

चेहऱ्यावर सतत वजन जाणवू नये यासाठी प्रोसेसर आणि बॅटरीचा भार चष्म्याच्या फ्रेमवर न ठेवता एका छोट्या बाह्य ‘पक युनिट’मध्ये (Pocket Unit) ठेवण्यात आला आहे. यामुळे चष्म्याचे वजन केवळ ९५ ग्रॅमपर्यंत मर्यादित ठेवणे शक्य झाले आहे. खिशात किंवा बॅगेत ठेवता येणाऱ्या या मुख्य युनिटमध्ये पॉवरफुल स्नॅपड्रॅगन चिपसेट आणि ४,४५५ एमएएच क्षमतेची बॅटरी बसवण्यात आली आहे, जी एका चार्जवर दैनंदिन कामे सहज पूर्ण करते.

Google DeepMindच्या माजी संशोधकाचा इशारा; ‘AI मानवतेसाठी मोठा धोका ठरू शकते’

२. पारदर्शक व्हिजन आणि हाय-रिझोल्यूशन डिस्प्ले

या चष्म्यात ऑप्टिकल सी-थ्रू तंत्रज्ञान वापरले गेले आहे. याचा अर्थ चष्मा डोळ्यांवर असतानाही समोरील व्यक्ती, रस्ता किंवा परिसर नैसर्गिकरीत्या स्पष्ट दिसतो. लेन्सच्या आत सोनीच्या मायक्रो-ओएलईडी स्क्रीनद्वारे ७० अंशांच्या व्ह्यूइंग अँगलमध्ये आभासी डिस्प्ले तयार होतो. १२० हर्ट्झ रिफ्रेश रेटमुळे डिस्प्लेवरील हालचाली अत्यंत जलद आणि स्मूथ वाटतात. कामाच्या वेळी एकाच वेळी दोन ते तीन आभासी स्क्रीन्स वापरकर्त्याच्या समोर तरंगताना दिसू शकतात.

३. जेमिनी एआय (Gemini AI) चे स्मार्ट साहाय्य

गुगलच्या प्रगत जेमिनी एआयचे सपोर्ट या डिव्हाइसला नेहमीच्या ग्लासेसपेक्षा वेगळे ठरवतो. चष्म्यात दिलेले मायक्रो-कॅमेरे युझर काय पाहत आहे हे स्कॅन करू शकतात. प्रवासात असताना एखाद्या परदेशी भाषेतील फलकाचे थेट भाषांतर करणे, समोर असलेल्या वस्तूंची माहिती गोळा करणे किंवा ईमेलचे उत्तर व्हॉईस कमांडने तयार करणे यासारखी कामे जेमिनीच्या मदतीने थेट डोळ्यांसमोर पूर्ण होतात.

४. ध्वनी आणि डिमिंग तंत्रज्ञान

या उपकरणात वातावरणातील प्रकाशाची तीव्रता कमी-जास्त करण्यासाठी ५-लेव्हलचे इलेक्ट्रोक्रोमिक डिमिंग तंत्रज्ञान दिले आहे. म्हणजेच उन्हात असताना लेन्सेस आपोआप गडद होतात आणि खोलीत आल्यावर पारदर्शक बनतात. ऑडिओसाठी यामध्ये बोसच्या (Bose) साहाय्याने तयार केलेले बिल्ट-इन स्पीकर्स आहेत, जे कानावर अतिरिक्त हेडफोन न लावताही स्पष्ट आणि सभोवतालचा (Spatial) आवाज पोहोचवतात.

मॉडेल, स्टोरेज आणि बाजारातील अपेक्षित किंमत

जागतिक बाजारात हे ग्लासेस प्रामुख्याने दोन प्रकारांमध्ये उपलब्ध केले जात आहेत:

• १२ जीबी रॅम आणि २५६ जीबी स्टोरेज मॉडेल: अंदाजे $१,०९९ (भारतीय चलनानुसार सुमारे ₹९१,००० ते ₹९३,०००)
• १६ जीबी रॅम आणि ५१२ जीबी स्टोरेज मॉडेल: अंदाजे $१,२९९ (भारतीय चलनानुसार सुमारे ₹१,०८,००० ते ₹१,१०,०००)

स्मार्टफोनच्या स्क्रीनवर तासन् तास डोळे लावून बसण्याऐवजी थेट दृष्टीक्षेपात आभासी जग अनुभवण्याची सोय या तंत्रज्ञानाने निर्माण केली असून, भविष्यातील वेअरेबल गॅजेट्सच्या स्पर्धेत हे उत्पादन एक महत्त्वाचा टप्पा ठरणार आहे.