ऑस्ट्रेलियात भारताच्या आधी रिलीज होणार रामायण! Godzilla सोबतच्या टक्करमुळे मेकर्सचा मोठा निर्णय

रणबीर कपूर, साई पल्लवी आणि यश यांची प्रमुख भूमिका असलेल्या बहुप्रतीक्षित रामायण पार्ट 1 ची सध्या जोरदार चर्चा सुरू आहे. नितेश तिवारी यांच्या दिग्दर्शनाखाली तयार झालेल्या या सिनेमाच्या रिलीजबाबत आता एक महत्त्वाची अपडेट समोर आली आहे. भारतात रिलीज होण्याआधीच हा सिनेमा ऑस्ट्रेलियातील प्रेक्षकांना पाहता येणार आहे.

मेकर्सनी ऑस्ट्रेलियातील रिलीजची तारीख एक दिवस आधी करण्याचा निर्णय घेतला आहे. त्यामुळे रामायण पार्ट 1 आता ऑस्ट्रेलियातील सिनेमागृहांमध्ये 5 नोव्हेंबर 2026 रोजी प्रदर्शित होणार आहे. याआधी आंतरराष्ट्रीय रिलीजसाठी 6 नोव्हेंबर ही तारीख जाहीर करण्यात आली होती.

Godzilla Minus Zero सोबत होणार मोठी टक्कर

रामायणच्या ऑस्ट्रेलिया रिलीजची तारीख बदलण्यामागे बॉक्स ऑफिसवरील स्पर्धा हे महत्त्वाचे कारण मानले जात आहे. Godzilla Minus Zero हा बहुप्रतीक्षित जपानी मॉन्स्टर चित्रपट 6 नोव्हेंबरला आंतरराष्ट्रीय बाजारात रिलीज होणार आहे. अशा परिस्थितीत रामायणला ऑस्ट्रेलियात एक दिवस आधी रिलीज करून सुरुवातीचा फायदा मिळवण्याचा प्रयत्न केला जात असल्याचे रिपोर्ट्समध्ये म्हटले आहे. 5 नोव्हेंबरला रिलीज झाल्यामुळे रामायणला Godzilla Minus Zero येण्यापूर्वी प्रेक्षकांपर्यंत पोहोचण्यासाठी एक दिवस मिळणार आहे. ऑस्ट्रेलियासारख्या महत्त्वाच्या आंतरराष्ट्रीय मार्केटमध्ये मोठ्या स्क्रीन आणि IMAX सारख्या प्रीमियम फॉरमॅटसाठी दोन्ही सिनेमांमध्ये स्पर्धा होण्याची शक्यता आहे. त्यामुळे रिलीजच्या तारखेत केलेला हा छोटासा बदल निर्मात्यांसाठी व्यावसायिकदृष्ट्या महत्त्वाचा ठरू शकतो.

अंजली आनंदचा पारा चढला! पापाराझीच्या कमेंटवर थेट सुनावलं

भारतात दिवाळीत पाहायला मिळणार रामायण

ऑस्ट्रेलियातील रिलीज एक दिवस आधी होत असली तरी भारतातील प्रेक्षकांना रामायण पार्ट 1 साठी थोडी प्रतीक्षा करावी लागणार आहे. सिनेमाचा भारतातील रिलीज 8 नोव्हेंबर 2026 रोजी दिवाळीच्या मुहूर्तावर करण्याचे नियोजन आहे. आंतरराष्ट्रीय बाजारात 6 नोव्हेंबरला रिलीज होणार असून ऑस्ट्रेलियात त्याआधी 5 नोव्हेंबरला चित्रपट प्रदर्शित केला जाणार आहे. या सिनेमात रणबीर कपूर भगवान राम यांच्या भूमिकेत दिसणार आहे. साई पल्लवी सीतेची भूमिका साकारत असून यश रावणाच्या भूमिकेत दिसणार आहे. याशिवाय सनी देओल हनुमानाच्या भूमिकेत तर रवी दुबे लक्ष्मणाच्या भूमिकेत दिसणार आहेत.रामायण दोन भागांमध्ये प्रेक्षकांच्या भेटीला येणार आहे. पहिला भाग दिवाळी 2026 मध्ये रिलीज होणार असून दुसऱ्या भागाचे प्रदर्शन दिवाळी 2027 मध्ये नियोजित आहे.

रामायणची आंतरराष्ट्रीय बाजारपेठेत मोठी तयारी

नितेश तिवारी दिग्दर्शित रामायण हा केवळ भारतीय प्रेक्षकांसाठी बनवलेला सिनेमा नसून त्याला मोठ्या आंतरराष्ट्रीय स्तरावर पोहोचवण्याची निर्मात्यांची योजना आहे. त्यामुळे भारताबरोबरच परदेशातील रिलीज आणि प्रमोशनकडेही विशेष लक्ष दिले जात आहे. चित्रपटाच्या निर्मितीमध्ये मोठ्या प्रमाणावर व्हिज्युअल इफेक्ट्स आणि आधुनिक तंत्रज्ञानाचा वापर करण्यात आला आहे. त्यामुळे सिनेमागृहातील अनुभव मोठ्या पडद्यावर घेण्यासाठी प्रेक्षकांमध्ये आधीपासूनच उत्सुकता आहे. ऑस्ट्रेलियात एक दिवस आधी रिलीज करण्याचा निर्णय या आंतरराष्ट्रीय रणनीतीचाच भाग मानला जात आहे. आता रामायण आणि Godzilla Minus Zero यांच्यातील बॉक्स ऑफिस स्पर्धेत कोणता चित्रपट बाजी मारतो हे पाहणे महत्त्वाचे ठरणार आहे.